Mitä kuuluu?
Risto-Pekka Blom: Mâiʹd kollai | 2010 | pešttmõš 3:19 | S
Tuejjõõzzâst: Risto-Pekka Blom tuejjõõzzâst vuõrâsooumaž ǩeâčč sniimmâm-mašinaaʹje da reäkk. Leša mäʹhtt? Nuʹtt, što kollai aivv mâʹte uʹcc ommǥiʹžžen. Jiõnn da kartt lie põõus-synkronõsttum (lip-sync), leša muđoi vaaiktelm lij pannvuõiǥâs. Nuʹbb välddõõzzâst seämma ooumaž pååǥǥast da õinn kollai mâʹte uʹcc ommǥiʹžžen. Tuejjõs nårrai määŋgin välddõõzzin, koin pukin lie seämma risttreidd. Vuõssmõs reäkkmõõžž võl påǥstâʹtte, leša siõmmnai siõmmnai tõk vuäǯǯa ǩiiččeeʹjest tuõđâš. Ommǥa reäkkmõõžž koʹlle grååtnʼjen da tõid trestjet nuʹtt puârast, što jieʹtt vuäitt njaakkâd siõmmneʹžže ǩiiččeei-i jurddjid. Tuejjõõzz lopp-pieʹll lij kuuitâǥ juʹn rämm huʹǩstõs.
Čeäppneeʹǩǩ kovvummuš tuejjõõzzâst: Tuejjõs õhttad ommǥa reäkklâs da rämm jiõnid kaʹrtte, koʹst vuõrâsoummu da -neezzan čuäʹjtâʹlle ommǥa jiõnnâz da tõõi õhttneei toobdpaaiʹǩid. Videotuejjõs ǩiõttʼtââll humoristlaž naaʹlin taarbân priimmjõõvvâd da šõddâd rääʹǩǩstemnallšeʹmmen da lekklviʹžžen.
Projeʹktt: Kaart da jiõn risttreidd
Sniim da jiõnad materiaal, mâʹst vueʹlǧǧemsââʹjjen lij vuâstbieʹlin siõrrmõš: vuõrâsooumaž–ommǥaž, ooumaž–jieʹlli, staani–põõlteei, uʹcc–jõnn, vuäʹmm–oʹđđ, meälǥas–jåʹttel, ǩeäʹppes–lossâd da nuʹtt ooudâs. Kartt vuäitt õhttned vuâstbeäʹl nuʹbb vueʹssbeälla da jiõnn nobba.
Vuäitak ââʹnned sniimeeʹl mäŋgg karttrajjõõzz veiddsõs takaikaartâst pâi nagg âʹlddkaʹrtte. Smiõtt sniimeeʹl še karttkuuʹlmid.
Editâʹsttemprograammâst vuäitak čuõppâd jiõn da kaart nuʹtt, što tõk puåtkkne seämma pääiʹǩest leʹbe aaibâs jeeʹrab. Prograammin lij vueiʹtlvaž raajjâd jiõʹnne da kaʹrtte määŋgnallšem muttsid, koid vuäitt ǩiõččlõõttâd tän tuejjõõzzâst. Jäänmõsân õnnum efeeʹkt lie meälǥtummuš da jåʹttlâttmõš. Vuäitak ǩiõččlâʹstted še, muʹvddmen jiõn kollai põõđlõs soiʹttjeeʹl. Hoʹhss! Tââđjubun jiõnin kannât tueʹjjeed mâʹte tuejjõõzzâst Mâiʹd kollai: aalǥâst jiõn äʹlǧǧe siõmmna ouddâl kaart da looppâst tõk kollʼje võl siõmmna ääiʹj tõn mâŋŋa, ko kartt lij juʹn meädda. Vueiʹttemvuõđ editâʹstted jiõn vaajtâʹlle jeeʹres prograammin, leša tääuʹjmõsân editâʹsttemprograammin lij mååžna sieʹtted kuuitâǥ jiõn õllâdvuõđ da šääiǥted tõn. Efeeʹktid vuäitt piijjâd pukid jiõnnteâttõõzzid leʹbe še neeʹttest laaddum efeeʹktid. Seämma jiõʹnne vuäitt õhtteed mäŋgg jeeʹresnallšem efeeʹkt. Jiõnid vuäitt ââʹnned še pâjjlõõžži da njââlʼjâʹtted luämmlõõžži, da tõid lij mååžna šõddeed leʹbe jääđted siõmmnai siõmmnai.
