Elinkaara
Jukka Silokunnas: Elinkaara | 2011 | guhkkodat 01:20 | S
Duoji birra:
Elinkaara lea still-govaiguin animerejuvvon videoduodji, man vuolggasadjin leat dieđalaš dokumeanttat eanaiduvvi ealliid birra. Duodji lea govvejuvvon dáiddára mánnávuođa ruovttu šiljus. Dáiddár oaččui eanaiduvvi biilla skeaŋkan áhčistis 17-jahkásažžan.
Dáiddára válddahallan duoji birra: Ovtta olbmo luodda lea smávis, muhto áiggi mielde geađgige gollagoahtá, go seammá sajis vázzá doarvái dávjá. Mun smiehtan olbmo vejolašvuođa oaidnit iežas eallináiggi dáhpáhuvvi nuppástusa iežas birra. Biila eanaiduvašii muhtumin lundui, muhto mun in gearggašii iežan eallima áiggi oaidnit dan jávkama. Mun álgen jo ovdal dán filmma govvet seammasullasaš dujiid, main lunddolaš eanaiduvvanproseassa dahkkojuvvo animašuvnnain muhtin ‘eahpelunddolaš’ diŋgii. Filmma dahkama áigge smihtten iežan rolla dán birrasis, mas olmmoš bastá duddjot lunddolaš materiálain juoidá, mii ii gula lundui. Duodji addá liibba smiehttat, man olu áigi luonddus gollá beassat errui olbmo luottain.
Dáidda addá lobi stoahkat, stoahkama haga ii leat mihkkige.
Ságastallama doarjjan:
Elinkaara-duodji govve humoristtalaš vugiin biilla eallima. Biila bieđgana ja jávká čalmmiid ovddas áibbas dego mieski heđen.
Sáhttágo biila bieđganit ja eanaiduvvat iešalddis?
Makkár lea biilla eallinjohtu albma láhkai?
P.S. Elinkaara-duoji buvttadeapmái sáhttá oahpásnuvvat YouTubes geahččamiin filmma Näin tehtiin Elinkaara.
Prošeakta: Johtilis njoahci
Govvejehket muhtin johtilis dáhpáhusa ja njoahcudehket video. Maid áššiid njoahcudeapmi buktá oidnosii, maid dábálaš leavttuin ii geargan oaidnit ja áicat?
Prošeakta: Timelapse
Timelapse-teknihkain sáhttá jođálmahttit njoazes dáhpáhusaid, vai daid lea álkit áicat. Timelapse-govvemis kámera stellejuvvo guhkes áigái váldit gova dihto áigegaskkaid. Timelapse-filmmaid dahket dávjá ovdamearkka dihte luonddualbmonemiin (beaivváža badjáneapmi, balvvaid lihkadeapmi) dahje eanaiduvvamis (ehpela mieskan). Govvenáiggi guhkkodat lea gitta das, man johtilis nuppástusa áigu govvet. Juos háliida oaidnit jođálmahttojuvvon ehpela mieskama, kámera galgá stellet govvet vaikkeba ovtta gova diimmus ovtta vahku áiggi. Go váldojuvvon govaid geahččá maŋŋálagaid videon, oažžu miellagova jođálmahttojuvvon dáhpáhusas!
Makkár njoazes dáhpáhusaid don sáhtášit vurket timelapse-govvemiin? Maid áššiid timelapse-govvemiin sáhttá buktit oidnosii, mat muđui báhcet fuomáškeahttá?
Dahkkit iežadet timelapse-video!
Máŋgga mobiilabiergasii oažžu áppaid, maiguin sáhttá dahkat timelapse-videoid. Áppain sáhttá ásahit dan áigegaskka man háliida govaid váldimii ja geahččat válmmaš filmma govaid váldima maŋŋá. Sáhttibehtet ohcat vuogas prográmmaid ovdamearkka dihte ohcansániin “timelapse”. Timelapse-govvema sáhttá dahkat maiddái dábálaš kámerain, goas galgá čuovvut áiggi diimmuin ja váldit gova vaikkeba 10 sekundda gaskkaid. Loahppabohtosa sáhttá geahččat njuolga kámera šearpmas bláđemiin govaid johtilit. Govaid sáhttá laktit videon dihtoriid editerenprográmmaiguin, juos lea dárbu.
Fuom! Rivttes govvengaskka áigi mearrašuvvá govvenláhkái diŋgga lihkadeamis ja gávdnu geahččalemiin. Kámera ii oaččo lihkahit govvema áiggi, nu ahte stelle dan starga vuoláža ala dahje juolgái!
