Mitä kuuluu?
Risto-Pekka Blom: Mii kulloo (Mitä kuuluu) | 2010 | pištem 3:19 | S
Tyeje pirrâ: Risto Pekka Blom tyejeest rävis almai kiäččá kameran já čiäru. Mutâ maht? Nuuvt, ete sun oro aaibâs uccâ umogâžžân. Jienâ já kove láá povsâsynkronistum (lip-sync), mutâ mudoi mielâkove lii viehâ epituotâ. Nube kuáhtámist siämmáš almai povvust já oro ain uccâ umogâžžân. Tyeji lii rahtum maaŋgâ väldimist, moin puohâin lii siämmáš ruossâlâsvuotâ. Vuossâmuuh čierih vala povvustitteh, mutâ kuuloold keččee šadda tuođâlubbon. Umogái čierih oroh olmân, já muáđuh lihâdeh toi mield nuuvt čeepiht, ete keččee jurduid-uv sáttá mottoom puudân njaahâđ eeti. Tyeje loppâpeeli lii kuittâg jo ilolâš skužestem.
Taidâr valdâlem tyejeest: Tyeji ovtâstit umogáá čiärráás já ilolâš jienâid kován, mast rävis almaah já nisoneh čaittâleh umogáá jienâdmijd já toid lahtojeijee tobdoid. Videotyeji kieđâvuš humoristlijn vuovvijn mii táárbu tuhhiittuđ, uážžuđ rähisvuođâ já leđe luholâš.
Proojeekt: Kove já jienâ ruossâlâsvuotâ
Kuvvii material já paddii jienâid, mast vuolgâsaijeen lii vyestikejijguin sierâdem: rävisolmooš–umogâš, olmooš–ellee, torvolâš–paldee, ucce–styeres, puáris–uuđâs, hiđes–jotteel, keepis–lussâd já nuuvt ain. Kove puáhtá lohtuđ vyestikečipaarâ nube uásipiälán já jienâ nuubán.
Tun puávtáh kevttiđ kuvvimist maaŋgâ jieškote-uv koveraijim vijđes almoskooveest ain čovgâ aldakován. Smietâ meiddei kuvvimsuundijd kuvviidijnâd.
Editistemohjelmist puávtáh čuoppâđ jienâ já kove nuuvt, ete toh potkâneh siämmáin soojijn tâi aaibâs sierâ. Ohjelmijguin puáhtá porgâđ jienân já kován maaŋgâlágán nubástusâid, maid puávtáh keččâliđ taan hárjuttâsâst. Hiđásmittem já jođálmittem láá puoh enâmus kevttum efekteh. Tun puávtáh še keččâliđ, maggaar jienâ oro maŋaspoođâi.
Huám! Táválávt jienáin kannat porgâđ tegu tyejeest Mii kulloo: aalgâst jienah älgih váhá ovdil kove já loopâst toh kullojeh vala puddii ton maŋa, ko kove lii jo jävkittâm. Máhđulâšvuođah jienâi nubástutmân láá jieškote-uvlágáneh jieškote-uv ohjelmijn, mutâ iänááš editistemohjelmijn lii máhđulâš haldâšiđ aainâs-uv jienâ aloduv já pieijâđ tom skaaijâđ. Puoh jienâvuárháid, ađai meiddei neetist viežžum jienáid, puáhtá lasettiđ efektijd. Siämmáš jienân puáhtá lahteđ maaŋgâid-uv efektijd. Jienâid puáhtá meiddei kevttiđ pajaluvâi já snjagottittiđ luámádâs, já toid puáhtá styerediđ tâi jávuttuttiđ mudolávt.
